Hnahsin Kût 2025 chhimtu an ṭhahnem

Champhaia Hnahsin Kut hman zawh tak chu chhimtu an ṭhahnemin sum leng vak pawh a tam hle. Hnahsin Kut Organising Committee-in a tarlan danin, kût hman ṭan hma September thla tawp aṭanga kût neih thlenga hnahsin hmun tlawhtu hi khawtual mi leh khualzin nuai 1.2 vel niin an chhut. Kût tawp zana Mualnuama concert neih chu mi 42,000 velin an chhim nia chhut a ni bawk.

Hnahsin Kut neihnaa stall neitute inhralhna belhkhawm chu Rs nuai 200 vel a ni a; Champhaia hotel, guest house leh homestay-te sum lak luh belhkhawm chu Rs nuai 400 vel a tling bawk. Heng hmuna khualzin thleng an chhinchhiahte chu Mizoram chhung mi 5,100, Mizoram pawn mi 805 leh India ram pawn mi 56 an ni. Chhungte, ṭhiante leh thawhpuite hnena thleng tam tak an awm bawk.

Kût vanga Champhai leh a chhehvel bawra sum che vel leh lut hi Rs nuai 1,500 vel nia chhut a ni. Taxi, motor silna, restaurant bakah Champhai bazar, Aizawl- Champhai kawnga hotel/restaurant leh nepnawi zuar, Zokhawthar leh a chhehvela lirthei leh sumdawngte inhralhna pawh cheng nuai za tel a tling.