Zaninah 'Project Brahmastra' football exhibition match

WATO Trust bultuma 'Narco-Free Mizoram' tih hmanga ruihhlo dona leh inzirtirna kalpuina, 'Project Brahmastra' hnuaiah Mizo ṭhalaite tan infiamna leh intihhlimna buatsaih a ni. Nimin khan 3x3 Basketball inelna Falkland-ah huaihawt a ni a, zanin hian Rajiv Gandhi stadium-ah football exhibition match neih a ni ang. Mizo ṭhalai infiammi, rimawi, leh lemchan lama hriat hlawh tak takte an intum dawn a, Zonet-ah live-a pek chhuah a ni ang.

Football exhibition match-ah hian infiammi lar tak tak - Jeje, Lalrina Renthlei, Isak Ralte, Denic, Chullova te an inlan dawn a, rimawi lama thawm nei lian J. Rosanga, Taitea, Young Fella, David Darlong te an tel dawn bawk. Anni bakah mipui lawm hlawh Drew Pachuau, Zira PC, Ralakone, Tommy, Papuia te pawh an inkhel ve dawn a ni.

Commentator-ah Mastea a awm dawn bawk a, TV lama lo thlirtu tan pawh inkhel bakah Mastea thukhawchang hriat tur a awm dawn a, a hmuhnawm bakah a ngaihnawm tel dawn. Programme hman turah hian WATO Trust chuan Sports department, Excise & Narcotics department, Social Welfare department, Sports Authority of India, Mizoram Basketball Association, Mizoram Football Association leh Assam Rifles te an thawhpui.