New York City-in social media hrang hrang a khing

New York City chuan Facebook, Google, Snapchat, TikTok leh social media dang eng emaw zat chu naupang rilru sukthlek a chhe zawnga hruaitu leh, rilru lama harsatna thlentu an ni tiin a khing. City chuan Manhattan-a federal court-ah page 327 lawsuit an theh lut a ni.

Thubuai an thehluhah Facebook, Snapchat leh Tiktok bakah social media dangte chuan naupang leh ṭhalaite a ṭha lo zawngin a nghawng tih an tarlang. New York City high school zirlai 77.3% chuan darkar thum emaw a aia tam social media-ah hun an hmang a, an mut tlem bakah school kal lo an tam phah tih an tarlang bawk.

Ṭhalai tam zawkin social media an hman aṭangin New York City-a off-campus-ah thil hlauhawm leh thihna hial thlen thei a pung nasa tih thubuai theh luhah tarlan a ni bawk. Hetiang thil thlenna chhan pakhat chu social media post viral hmanga thehdarh nia hriat 'subway surfing' a ni. NYC Police Department data tarlan danin, kum 2023 aṭang khan ṭhalai 16 vel an thi tawh a, an zingah hian hmeichhia kum 12 leh 13 mi an tel.