Mahindra Bolero leh Bolero Neo thar tlangzarh

Mana Motors chuan Mizoramah Mahindra Bolero leh Bolero Neo thar an tlangzarh.

Nimin khan an showroom, Bawngkawnah Asian Armwrestling champion Denic Lalruattluanga leh Mana Motors Dealer Principal Dr Franklin Lalrinngheta'n an khuh hawng.

Kum 2000 khan a vawi khat nan Mahindra-in Bolero a tichhuak a, car an siam chhuah tawh zinga an hralh theih ber pawl ni rengin 2021 khan Bolero Neo an tichhuak tel bawk a, a vaiin nuai 16 chuang an hralh chhuak tawh.

Mizorama Mahindra full range dealer Mana Motors neitupa, Dr Marina chuan, Mizorama motor lar ber sawi dawn ta se Bolero a nih a rin thu a sawi a, kawng chhia leh khawpui kawngah hman kawp theih a nih avangin mi tam takin motor ṭha berah an ngai a ni, a ti. A rin tlak avangin sorkar pawhin a hmang nasa a, an kawl sa leh Mizoram pana lo kal mek nen 20 chuang chu a zo nghal vek dawn tih a sawi.

Bolero pangngai chhuak thar hi Mizoramah a man tlawm ber cheng Rs 9,05,837 a ni a, a man to ber Rs 10,89,068 a ni ve thung a, Bolero Neo chhuak thar man to ber cheng nuai 9,70,159 a nih lain a man to ber Rs 11,20,334-in a lei theih a ni. Bolero tharah hian 1.5 litre mHAWK75 turbo engine vuah a ni a, Bolero Neo tharah 1.5 litre mHAWK100 turbo engine vuah a ni ve thung a, diesel hmang ve ve tura siam a ni.