LPS Comedian Search neih a ni leh dawn

TV show hlimawm leh ngaihhlut hlawh tak, LPS buatsaiha kum tina neih ṭhin 'Comedian Search' chu kumin October 24 aṭangin neih a ni leh dawn ta.

Comedian Search hi kum 2008 aṭang khan buatsaih ṭan niin Covid-19 hri leng vanga kum 2020 kuma an awl tih loh chu kum tin buatsaih a ni. Kumin hi a season 17-na tur a ni a, Mizorama TV show kal tluang rei ber a ni.

Kumina Comedian Search main sponsor hi 'LBS Durian Furniture' a ni dawn a ni. Tel tum tan October 23 hmain LPS Office, Zarkawt leh LPS 9 Office, Dinthar-ahte entry form lak chhuah theih a ni. Aizawl khaw pawn, a hmuna kal rem lote tan online-a hming pek luh theih a ni dawn bawk a, phone number 6033189238-ah office hun chhungin hming pek luh theih a ni ang.