Mahindra BE 6 leh XEV 9e tlangzarh

Mana Motors showroom, Bawngkawnah nimin khan Mahindra SUV electric car chi hnih - BE 6 leh XEV 9e chu Mizoram Traffic Senior SP Ruatsanga Ralte in a tlangzarh.

Mana Motors hian Mizorama electric car an tlangzarh hmasak ber a ni a, BE 6 man tlawm ber Rs 20,84,339 niin a to ber Rs 30,11,431-in a lei chhuah theih a, XEV 9e man tlawm ber Rs 23,95,622 a nih laiin a to ber Rs 33,82,926-in a lei theih.

Kumin March aṭangin Mahindra-in India ramah electric car pahnih hi a hralh chhuak a, thla nga chhungin 20,000 an hralh. Dr Franklin Lalrinngheta, Mana Motors Dealer Principal chuan mipui duh dan khalh nuam, nalh leh chak cho phak tura duan a ni tih a sawi.

Info Car hotupa Vanlalmuana chuan BE 6 leh XEV 9e chu a pianhmang inang lo deuh mah se a khawl pawimawh hrang hrangah inang a tam a, electric super car niin India rama car chak ber pawl a nih thu a sawi. Battery chi hnih a hmang ve ve a, ARAI-in a pawmpui danin 79 kWh hmang BE 6-in km 682 a tlan thei a, 59 kWh hmangah km 557 a tlan thei ve thung. XEV 9e-ah 79 kWh battery-in km 659 leh 59 kWh-in km 542 a tlan thei a. Mizoram kawng chhuk chho leh zimah km 400 vel tlan thei tura beisei a ni.