'Praise On 2024' pathumna Samuel-a MV hmasa ber chhuak dawn

Synod Information & Communication (Synfo) leh Central Kristian Ṭhalai Pawl (CKTP) buatsaih, zai intihsiakna 'Praise On 2024' a pathumna, Armed Veng tlangval Samuel Lalmuanchhana music video hmasa ber tur 'Ka fak tawh ang' tih chu zanin hian Zonet leh LPS Vision-ah tihchhuah a ni dawn a, Pathianni zan aṭangin YouTube-ah dah a ni ang.

'Ka fak tawh ang' tih hla hi Samuel-a phuah a ni a, ringtuin hringnuna harsatna a tawk chung pawha Isua hnung zui tura a inhlanna hla, harsatna leh hrehawm awm lohna vanrama Pathian fak a thlakhlelhawm zia puanchhuahna a ni bawk. Music hi Elvis Lalduatpuia (Vistea) siam niin ṭingṭang hi T. Lalruatfela perh a ni a, Dawngtea (Rock of Ages) hnenah recording tih a ni. Backing vocal hi Esther Lalramthari a ni a, video hi P. Vanlalhriatpuia (Cheecha) direct niin videographer hi Badampuia a ni thung.

Samuel-a hian zai lamah hian chhun tur a nei ṭha hle a, a pa Z. Lalthanzuala hi kum 1991 October aṭang khan All India Radioa (AIR) B High grade artist niin, 'Jordan lui malin ka kai lo vang' tih hla Mizo zinga sa lar chhuaktu kha a ni.