ABC-in Jimmy Kimmel show tiamchin awm loin titawp rih

Disney enkawl ABC chuan an channel kaltlanga pek chhuah, comedian Jimmy Kimmel host 'Late Night show' chu right-wing influencer Charlie Kirk thah a nihna chungchang a ṭawngkam a hman dan vangin tiam chin awm loin an titawp rih, "Jimmy Kimmel Live chu thil thleng thei venlawkna atana tiam chin awm loin tihtawp rih a ni" tih thuchhuah an siam.

Kimmel hian Thawhṭanni khan a show kaltlang hian Kirk thah a nih chungchang president Donald Trump-a'n a dawnsawn dan chu sawiselin, "MAGA gang chuan Kirk thah a nih vang hian an politic dinhmun tihṭhatna remchangah an hmang a ni" a ti a, hei bakah Trump kap zuiin "Trump a hmalak dan chu puitling tihdan tur a ni lo, naupangin a sangha khawi a sun dan velin a sun uchuak mah mah a ni" a ti zui bawk.

ABC lamin Kimmel show an tihtawp thu an puan hnu hian Trump chuan ABC chu fakin "ABC chuan huaisen taka an tihtur an tih vang hian ka lawmpui hle a ni" tiin social media-ah post a siam zui bawk. Hetih laiin Kimmel hian Kirk thah a nih ni khan a IG account kaltlangin a thattu a dem thu leh Kirk nupui fanaute a tawrhpui thu hi a lo tarlang tawh a ni.