Narendra Modi biopic-ah Unni Mukundan

Silver Cast Creations chuan India prime minister Narendra Modi biopic 'Maa Vande' siam a ni dawn tih puangin, Malayalam-language cinema actor Unni Mukundan chu Modi lema chang tura tih a nih thu an puangzar nghal bawk. Mukundan hi Malayalam cinema action film 'Marco' leh 'Gurudan'-ahte pawh a lo chang tawh a ni.

Modi biopic siam a nih tur thu hi a piancham, nimin khan an puang a ni. Producer-te chuan international standard leh cutting-edge VFX technology hman a ni dawn tih an sawi. Modi chanchin, a naupan lai aṭanga ram hruaitu a nih thleng tarlan a ni dawn a, a nu thi ta Heeraben Modi nen an chanchin pawh dah tel a ni ang. Biopic hi Kranthi Kumar C.H chuan a ziah dawn bakah a direct nghal dawn a, Veer Reddy M chuan Silver Cast Creations hnuaiah a produce dawn a ni. Technical team zingah cinematographer K.K. Senthil Kumar, composer Ravi Basrur, editor Sreekar Prasad leh production designer Sabu Cyril-te an tel.