‘Project Chawlhna Krista' Episode-2 a chhuak dawn

Zoram rimawi khawvelin a zai thiam leh hla phuah thiam avanga kan hriat lar, Chris MS Dawngkima hla phuah hrang hrang dah khawmna 'Project Chawlhna Krista' Episode-2 chu tlangzarh a ni leh dawn ta. Project Chawlhna Krista hi episode hniha ṭhen niin Episode-1 hi April-ah tihchhuah a ni a, zaninah Episode-2 hi Zonet leh LPS-1 ah zan dar 9:00 hian tihchhuah a ni ang.

'Project Chawlhna Krista' episode-1 ah khan hla 11 dah a ni a, mimal zaithiam leh zaipawl sakte a ni hlawm. Episode-2 ah pawh hian hla 11 tho dah a ni a, zaipawl hla 'Ngai rawh i ka-ah' tih leh 'Fak rawh u' Ramhlun North Pastor Bial Zaipawl leh Peace Choir-te sak a awm tel leh dawn a ni. 'Fakna thang mawi' tih hla trio-a Zoramchhani, Stacy leh Israela Pachuau te sak hla thar a awm tel bawk a, a dang erawh kan lo hriatsa tawh hlate a ni hlawm.

Israela Pachuauin medley-a a sak ‘A chhelai siam ṭhatu’ leh ‘Tho la eng rawh’ tih leh, kum 2004 vel lai aṭanga hla lar tawh 'Hei hi ka ngen a che' tih pawh Chris-a leh Steward-a te unauin arragement dang hlaka an sak a awm tel bawk. ‘Nang i thianghlim si’tih chu Melody leh Zorinsanga ten duet-in an sa a, project hming tumtu ber hla ‘Chawlhna Krista’ chu Cindy Lalthanpuii'n a sa a, ‘Praise On’ aṭanga hming chher Samuel Lalmuanchhana'n ‘Lalpa chu a thianghlim e’ tih a sa bawk. Testimony hla ‘Hmangaih thuril ber’ tih chu Zorinsanga’n a sak bakah, Arini leh Isaac Hnamte te duet ngaihthlak tur a awm bawk a ni.

Heng hlate hi ‘CHRIS MS DAWNGKIMA’ YouTube channel lamah en theihin chhawpchhuah a ni. Live recording a nih avangin audio hi uluk theihtawpa khawih niin, belhchian dawl taka chhuahtu hi EFX Audio a ni. Episode -1 lo ngaithla tawh tan chuan episode-2 pawh ngaihthlak leh ngei a chakawm takzet.