Rsa channa 'Vawmpui Ngaw' tlangzarh dawn

LPS Youth Icon aṭanga Zoram mipui hriat hlawh. J. Lalrosanga (Rsa) channa film 'Vawmpui Ngaw' chu zanin hian Vanapa Hall-ah tlangzarh a ni dawn a, Lersia Play-ah en theihin a awm nghal bawk ang.

TML Production kut chhuak hmasa ber tur 'Vawmpui Ngaw' ah hian Mizo Film-a kan la hmuh ngai loh CGI hmanga savawm sual che tla vel tarlanna hmuh tur a awm dawn. Mizo film industry lama kan hriat lar tak takte an inlan dawn bakah, Zoram khawvel deng chhuak thei khawp a lar J Lalrosanga (Rsa) a inlan dawn avangin en a chakawm tawh hle. Ani bakah tawn hriat ngah leh lar tak tak Duhawma Hmar, Msi Hmar, Hlutei, Makima Chawngthu, Mpa Sailo, Lalruatpuia, Mesa Varte, Rinzuala Cherput, Alex hmar leh Annie Zote te an inlan bawk a, en a manhla hle dawn.

Kum 2024-a indin chauh ni mah se,TML Production hian film hrang hrangah CGI leh VFX te an lo khawih sak nual tawh a, an kut chhuakin belhchian a dawl ṭhin hle. Anmahni puala an project hmasa ber, 'Vawmpui Ngaw' ah hian CGI leh VFX a tel nual dawn a, savawm pawh hi 3D-a siam chawp vek a ni. Zanina tlangzarhnaah hian a hmunah ticket Rs. 100/- man lei tur a awm ang.