Mizo Idol Season 8 virtual audition nei mek

Zonet Cable TV buatsaih, zaithiam zawnna reality show ngaihven hlawh, 'Mizo Idol season 8' chu virtual audition kalpui mek niin, Video theh luh hi 200 dawn a tling tawh a, August 31 thleng video hi theh luh theih a ni a, telegram-a phone no 9436140012 ah theh luh theih a ni. Audition result hi September 9-ah puan a ni ang.

First Round hi September 23-26 chhungin neih a ni dawn a, September 27-ah result puan a ni ang. Top 10 aṭangin intihsiakna hi Dengṭhuama Hall-ah neih a ni dawn a, mipui tan pawh chhim theih a ni dawn a ni.

Kumin Mizo Idol thlannaah hian endiktu, judge thar hlak pathum kan hmu dawn. Zoram rimawi khawvela boruak nei lian tak vek an ni a, an theuneu dawn lo. An chetla leh kamchhuak te hmuh leh hriat a chakawm dawn. Zonet lamin judge turte hi an rawn pho chhuak thuai dawn e.

Kum danga lo kalpui tawh ang bawkin 1st round aṭangin Top 50 thlan chhuah a ni anga. A thiam zualte aṭangin Top 20 thlanchhuah an ni leh ang. Top 10 aṭang aṭangin pakhat te te in an tla pheuh pheuh tawh dawn a ni. Top 3 in elna neih hnuah Grand Finale show aṭangin Mizo Idol thar puan a ni ang.

Mizo Idol Season 7 ah khan T.Vanlalhmangaihi chu pakhatna niin, pahnihna C. Vanlalroluahtumi (Vli) leh pathumna David Lalchawisanga Darlong te an ni a, an zai thiam zia kan hre vek awm e. Kuminah pawh zaithiam ṭha tak tak kan hmu leh ngei dawn a, tu tak Mizo Idol ni ang maw!