Lehkhabu bawm: Zai mite tana lehkhabu ṭha 'Zaihla Zai Mi Puitu' a chhuak ta

Mizote hi zai ngaina leh zai lama tui hnam kan ni a, chumi tihmasawnna tur leh ṭhanlen tir thei tur lehkhabu ṭha tak mai 'Zaihla Zai Mi Puitu' tih chu mitin chhiar theih tura chhawp chhuah a ni ta. 'Mizo Idol' judge Lalrinzauva Sailo buatsaih a ni, a rintlak dawn tih a chiang. Zai lama tui leh thiam duh tan chuan chhiar ngei chi a ni ang.

Lehkhabuah hian vocal lama mi thiamte thuziak hrang hrang dah khawm a ni a, hmasawnna tur ṭha tak tak dah tel a ni. Zai mai bakah zaipawl kaihhruaina atana ṭangkai tur leh zaipawl member tan pawha mahnia hmasawn theihna tur thil tam tak tarlan tel a ni hian lehkhabu hlutna a tizual hle. Kohhran huang zaipawl leh a piahlam zai endik leh vocal exercise tihdan hman ṭangkai theih tur ṭhahnem tak lehkhabuah hian chhawp chhuah a ni.

'Zaihla Zai Mi Puitu' tih a nih ang hian zai thiam tum leh thiam sa, hmasawn tum tan a ṭangkai hle dawn a, lehkhabu chhunga lehkhaphek hmante pawh ṭha tak leh deh nuam tak tura duan a ni. Frazer Media Publication kut chhuak niin lehkhabu dawr hrang hrangah lei theih a zawrh chhuah a ni.