Sean Kingston kum 3 tang turin hrem

Beautiful Girls hla hmanga hriat lar, Sean Kingston chu internet kaltlanga mi bumna kaihhnawih thubuai a awrh laiah thiam loh chantir niin kum thum leh thla nga chhung lungin tang tura tih a ni. A thubuai ang bawk hian a nu Janice Turner pawh July khan thiam loh chantir niin Kingston tan hun chhung ang bawk hian hrem a lo ni tawh bawk.

Kingston leh a nu hi kumin March thla khan USD mtd 1 chu mi dang bumin an dil chhuak tih tarlan a ni a, an thubuai neihna hi mipali lakah niin kum 20 chhung lungin tan theihna a ni.

Kar hmasa khan Kingston leh a lawyer chuan tharum thawhna a thlen loh vang leh a pawisa laksak tam zawk a pek kir leh tawh bawk avangin hremnate tihnepsak turin ngenna an thlen a ni. Kum 2024 May khan rukruk thil vangin South Florida-a an in chu dapsak a lo ni tawh a, hei hi Kingston-an thil man to a leina sum a pek loh vanga hmalakna a ni. Hemi hnu hian Miami Federal court-ah inlanin mi dang bumna thil vang hian thubuai siamsak an ni zui a ni.