PETA-in 'Mario Kart World' a bawng hnarbeh dah bo turin ngen

Animal-rights advocacy group PETA chuan Nintendo chu an game tihchhuah zinga hralh hlawh ber, 'Mario Kart World' a bawng hnarbeh (brass nose ring) behtir a ni chu paihsak turin an ngen. 'Mario Kart World' hi June 5, 2025 ah Nintendo Switch 2-ah tlangzarh a ni a, June 30 thleng khan company chuan copy mtd 5.63 an hralh chhuak tawh a ni.

PETA chuan kar liam ta chhung khan campaign neiin, Japanese game siamtute chu bawng character-a hnarbeh chu thlak danglam turin an ngen a, sa leh bawnghnute siam chhuah kawnga tihduhdahna hrehawm tak bawngin an tawrh ṭhin lantirna a nih thu an sawi. Bawng hnarbeh chuan tharum thawhna leh ran chungah tihduhdahna a lantir tih tarlangin, game-a bawng awmdan chu duang ṭha leh turin an ngen.

Joel Barnett, PETA senior vice president chuan Nintendo president Shuntaro Furukawa hnenah lehkha thawnin, bawng hnarbeh chu dah bo turin leh zalen taka awm tir turin a ngen. Nintendo, America aiawh lam chuan hemi chungchangah hian thuchhuah an la nei lo thung.

He thil hi PETA-in Nintendo hnena ngenna a siam vawi khatna a ni tawh loa, kum 2020 khan 'Animal Crossing: New Horizons' ah sangha leh rannung laka tihduhdahna lam hawi a awm avangin ngenna an lo siam tawh bawk.