Disney leh Webtoon thawkdun dawn

Webtoon Entertainment leh Disney chuan inremna siamin Disney, Marvel, 20th Century Studios leh Star Wars-a character lar tak takte chu Webtoon-ah hmuh theih an ni dawn ta. Heng zingah hian Disney catalog aṭanga comic leh graphic novel awmsa, Webtoon-a vertical-scroll app atana reformat-te pawh a tel dawn a, hei mai bakah original title thar siam mekte pawh an tel dawn a ni.

Disney webcomic hi Webtoon English-language app section bikah dah an ni ang. Khawvel pumah Webtoon hian thla tin user mtd 155 vel a nei.

Webtoon-a character awm tur zingah hian Spider-Man, Captain America, Darth Vader, Beauty and the Beast leh a dang eng emaw zat an tel dawn. An inremsiamnaa sum hman dan tur erawh tarlan a la ni lo a,Webtoon nena thawhdun chu an thil tih tawh zawng zawng zinga lian ber a nih thu Disney Consumer Product digital innovation hotu senior VP Daniel Fink chuan a sawi.

Disney aṭanga webcomic hmasa ber tur hi 'Amazing Spider-Man' niin, August thla tawp lamah tihchhuah a ni ang. Chumi hnuah Marvel aṭangin 'Avengers', 'Star Wars', 'Alien' leh "As Old as Time: A Twisted Tale' te an rawn lang leh dawn a ni. Webtoon hian Disney nen an thawhdunna thar hi October 9-12 chhungin New York Comic Con-ah an promote dawn bawk. Webtoon freemium model hmangin webcomic episode hmasa lam chu a thlawna chhiar theih a ni dawn a, a vaia chhiar duhte chuan in-app 'coins' hmangin an lei a ngai dawn thung.