Eddie Van Halen-a Kramer guitar lilam dawn

Rock legend Van Halen band guitarist leh founder, Eddie Van Halen-a guitar hman lar tak '1982 Kramer Guitar' chu lilam a ni dawn. Guitar lilam tur hi Van Halen band-in 1982-1983 inkara tour an neih laia Eddie-a perh ṭhin kha niin, New York-a Sotheby's auction house-ah October 21-28 chhungin lilam tum a ni.

Eddie hian guitar technician Robin "Rudy" Leiren hnena a hlan chhawn hnuin Mötley Crüe guitarist Mick Mars hnenah hralh a ni a,ani hian an band No.1 album 1989-a tihchhuah Dr. Feelgood record-naah a hmang ve leh a ni. Mars hian a hman hnuah “Hope you enjoy it as much as I did. Also it’s a great piece of history.” tih a ziak nghe nghe.

Sotheby chuan Van Halen guitar hi USD mtd 2-3 inkara hralh theih an inbeisei. Kum 2023 khan Eddie guitar tho rawng sen, dum leh vara ṭial chu USD 3,932,000-in lilam naah hralh a ni a; 2020 khan a instrument pathum chu USD 422,000-in hralh a lo ni tawh bawk. Van Halen hi hun rei tak chhung cancer a vei hnuin October 2020 khan a thi a ni.