Zaithiam leh hla phuah thiam F Vanlalhriatrenga a boral

B Malsawmtluangi (Spi'n) thiam taka a sak ṭhin 'Ban zai ka rel mahna' tih hla phuahtu zaithiam leh hla phuah thiam ni bawk F Vanlalhriatrenga chu nizan khan Guwahati-ah chaw kawng cancer vangin kum 39 mi niin a thi.

F Vanlalhriatrenga hi Nursery Veng, Aizawla cheng a nia, a nupui leh a fate pathum nen khawsa mekin Mizoram Legislative Assembly 

Secretariat-ah a thawk a ni.

F. Biakzâma (L) leh Lalthianghlimi (L) te fa upa ber niin unau pali an ni a, Serchhip khuaah a piang a ni. Kum 1993-ah khan AIR-ah Child Artist-in a lût a, kum a tlin hnuah Artist puitling ni tura audition paltlang lehin AIR Aizawlah hla eng emaw zat a khung tawh. A zai thiam piah lamah hian AIR-ah hian Musician & Humour (fiamthu lam) artist a ni bawk.

Demand channel lar vanglai khan a hla phuah tam tak chu khatih hunlaia zaithiam larte khan an sa nasa ṭhin hle a, a lar pawh a lar hlawm hle. Kum 2005 khan a hla phuah hlang Cassette (Album) chu JER  Recording aṭangin produce a ni a, hetah hian zaithiam hrang hrang- Zosangliani, Liny Lalthanzuali, Elizabeth Zodinpuii, Lalngêngpuii, Lalramhluna (Kura 

zawngte), H.Lalṭhakima leh Joseph Zaihmingthanga te an zai a ni.

'Hnehna Tumkau' hla vang khan Zofate chuan F Vanlalhriatrenga hi kan hre chiang lehzual awm e. 'Hnehna Tumkau' album hi kum 2003 khan 

Vega Digital Sounds kaltlangin a tichhuak a, a hunlaia Fakna hla ber pawl a ni nge nghe a, hei bakah hian Rimawi khawvel new Artist collection leh Lalhmingmawii Rawihte hlate album-ah a zai ngaihthlak tur a awm bawk.

Nikum kum tir lamah khan damlohna avangin ICU-ah dah luh a ni a, chuta ṭanga rei vak loah chuan cancer a ni tih hi hriatchhuah zui a ni a, Pathianni zan dar 7:45 khan a boral ta a ni.