PUBG Mobile World Cup 2025-ah Yangon Galacticos champion

Saudi Arabia khawpui, Riyadh-a 2025 Esports World Cup neih mekah, Myanmar PUBG mobile team, Yangon Galaticos chu PUBG Mobile World Cup 2025-ah an champion a, lawmmanah USD 547,000 an dawng. Chinese team,Weibo Gaming chu pahnihna niin Mongolian team, Alpha Gaming chu pathumna an ni. Alpha Gaming ami DOK chu MVP ah thlan a ni.

Yangon Galacticos-ah hian player - Smile, Marnett, Romeo leh SAYCLOUD an awm a, match 18-ah point 157 an hmu. An champion kawng a awlsam lo viau a, group stage-a top 8-ah an lang pha lo a, hei vang hian grand finals-ah direct spot an nei pha lo. Survival stage-ah pawh final-a lut thei team hnuhnung ber niin point 1 in an pha chiah a ni. Mahse Grand Finals-ah rin phak bakin an che ṭha a, world champion an ni thei ta a ni.

Pahnihna Weibo Gaming hian point 142 hmuin lawmman USD 323,500 an dawng a, pathumna Alpha Gaming in point 141 hmuin USD 222,000 an dawng bawk.

2025 Esports World Cup hi July 8 aṭang khan neih niin, Aguust 24 thleng a awh dawn a, event 26 awmin esport 25 ah intihsiakna hi neih a ni. Kumina an telh thar, Chess Esports World Cup-ah world No 1 Magnus Carlsen chuan Alireza Firouz hnehin a champion bawk a ni.