GIG Motors Ṭhazual Lengzem: Lilac & Jacks an chungnung

GIG Motors Ṭhazual Lengzem chart tharah Lilac & Jacks 'Bumtu' chuan No 1 a rawn hauh ta. He hla hi Lilac phuah a ni a, recording hi Kings & Prophets Recording Studio-ah tih niin, mixing leh mastering hi Paul Sungte kutchhuak a ni. Music video hmuhnawm tak leh mawi tak mai hi John Lalremmawia kutchhuak a ni bawk. Lilac a zaithiamin a aw ngaihthlak a nuam hle a, musician-te pawh an duai lo. Hla ngaihthlak hlawh tak a la nih zel a rinawm.

Pahnihnaah Top 10-a lo lang reng tawh leh chart hmasaa pathumna ni bawk, Rosalind Khawlhring ft Olaf Tea 'Ka Tuiral' chu a rawn lang. He hla hi Olaf Tea phuah a ni a, Music leh audio hi Smiley kutchhuak niin, music video hi Osiama Pictures siam a ni. Saka ft. BZi Tochhawng 'Ṭhiante Ṭhian' chu pathumnaah rawn langin, No.4-ah Guru Gee Ft Mary Dawngi 'Geepui' chuan a dinhmun ngai a la luah a, No.5-ah Lesky Hype & Angela Malsawmpari 'Van Sangah' tih a rawn lang bawk.