Inter Branch YMA Quiz Competition champion Republic Veng Branch YMA

Central YMA buatsaih, LBS Suzuki Inter Branch YMA Quiz Competition 2025 chu July 11, Zirtawpni zan khan final neih a ni a, Republic Veng Branch YMA an champion.

Final-ah hian YMA branch pathum - Republic Veng, Vaivakawn leh Chhiahtlang Kawng veng te an in el. Zawhna 18 an chhanna aṭangin point hmu sang pahnih Republic Veng leh Vaivakawn hian point 100 ve ve an hmu a, tie break-ah Republic lam hian chhang dikin Central YMA buatsaih Quiz intihsiaka champion hmasa ber an ni ta a ni.

Republic Veng champion puitute hi Lalbiakfela leh R.Zomuanpuia an ni a, intihsiakna neih tur atan hian an inbuatsaih ṭha hle a, an veng library-ahte an riak lut hial a ni. Lawmman pakhatna hian pawisa fai, Rs 1,00,000 bakah trophy leh citation an dawng. Pahnihna Vaivakawn hian Rs 70,000, trophy leh citation dawngin, pathuma Chhiahtlang Kawng Veng hian Rs 50,000, trophy leh citation an dawng bawk.

Inter Branch YMA Quiz Competition 2025 hi July 1 aṭang khan neih ṭan a ni a, YMA branch 58 an tel a ni.