Zaninah Mawimawia leh Diki Khawbel-te MV thar

Mizo Icon 2024 aṭanga kan hriat lar, Ramengmawia (Mawimawia) leh Diki Khawbel te chuan an thawh dunna music video thar chu zanin dar 8:00 hian an ti chhuak dawn. Mawimawia Official YouTube channel-ah dah chhuah a ni ang.

Music video an tih chhuah tur hi 'Thinlung Thawnthu' movie Original soundtrack a ni a, nula tlangvalte duh leh ngainat tur taka siam a ni. Thinlung Thawnthu movie hi Fanai Pictures movie palina tur a ni a, he movie-ah hian a changtunu leh changtupa an ni nghal bawk.

A hla hi Mawimawia phuah niin Westend Studio-ah recording tih a ni a, movie shooting an neihna Champhai leh a chhehvelah video hi siam a ni. Mawimawia leh Diki te hian a hmain 'In tawng leh ngei ang aw' tih hla mawi takin an lo cover dun tawh a ni.