July thla box office thawm a ring dawn

Movie ngainatute tan July thla chu a khawhar thlak dawn lo e, box office lama thawm nei lian tura ngaih film eng emaw zat tih chhuah a ni chho dawn. Khawvel huapin theatre lam pawh a lun chhoh hle a rinawm.

Tun thlaa movie lian tih chhuah hmasa ber, July 2-a tlangzarh 'Jurassic World Rebirth' chuan beisei lawk ang ngeiin boruak a nei lian hle. Tlangzarh karah box office-ah pawh No 1 a rawn hauh thei nghal a ni.

July 11 hian 'Superman' a chhuak dawn a, nipui chhunga film chhuak zinga thawm nei lian ber tur zinga rin a ni. James Gunn direct a ni a, he fim hi Superman origin story ni loin, Lois Lane (Rachel Brosnahan) leh Clark Kent (David Corenswet) te lam thlurbing deuh bik a ni ang. A vawi khatna atan David Corenswet chu Clark Kent/Superman-ah a rawn chang dawn a ni.

Boruak siam thei tur dang, 'Smurfs', 'I Know What You Did Las Summer' leh 'Eddington' te chu July 18 hian tlangzarh an ni dawn bawk. 'Smurfs' hi June 28 khan Brussels-ah premier a ni tawh. 'I Know What You Did Last Summer' origin hi 1997 ah tih chhuah niin, a chhunzawmna pahnih siam a ni tawh bawk. Kum 2021 khan Amazon Prime Video-in TV series a lo siam tawh bawk.

July 25-ah 'Fantastic Four : The First Steps' , 'The Home' leh 'Happy Gilmore 2' tih chhuah a ni dawn bawk. 'Fantastic Four' hi Marvel Cinematic Universe (MCU) film 37-na leh, Fantastic Four film series reboot vawi hnihna tur a ni.

July 30-a chhuak 'Together' pawh hian ngaihven a hlawh hle. He film hi supernatural body horror film a ni a, a changtute hi atakah pawh nupa Alison Brie leh Dave Franco te an ni a, January 26 khan 2025 Sundance Film Festival ah premier a lo ni tawh.