One-Punch Man season 3 kuminah chhuak dawn

Anime leh Manga ngainatute tan thu lawmawm, satirical superhero anime One-Punch Man chu kum ruk zet tih chhuah chhunzawm a nih loh hnuah kuminah tih chhuah chhunzawm a ni leh dawn ta. One-Punch Man season-3 hi manga leh anime platform Viz Media chuan North America huamchhunga tih chhuah phalna an leifel tawh bawk a, October kar tir lamah tih chhuah hman tum a ni.

One-Punch Man season tharah hian mi sual thar eng emaw zat an lang leh ngei dawn niin trailer aṭang chuan a hmuh theih. Season hmasa ber hi kum 2015 daih tawha tih chhuah niin season 2 chu 2019 khan tih chhuah a ni a, hemi hnu hian a chhunzawmna siam a ni zui ta lo reng a ni. October thlen hma chu season 3 nghah pahin Saitama work out routine 100 push-up, sit-up, squat, leh km 10 tlante kan lo practice thei ang.

Kumin chhung hian anime hit tak tak My Hero Academia season 8, Dan Da Dan season 2, Bleach: Thousand-Year Blood War part 4, Demon Slayer Infinity Castle, Jujutsu Kaisen: Hidden Inventory/Premature Death movie, Demon Slayer Infinity Castle, Chainsaw Man – The Movie: Reze Arc -te tih chhuah hman tum a ni bawk. Anime ngainatu tan en tur a in dawt chho leh zut dawn e.