Trump-an TikTok lei tur an awm thu a sawi

US president Donald Trump chuan China siam social media app lar, TikTok chu mi hausa tute emaw lei tur a hriat tawh thu Fox News a hrilh. Mahse TikTok lei tur chuan China lamin an pawmpui a ngaih thu sawiin China president Xi Jinping pawhin a remtih ngei a rin thu a tarlang tel bawk.

President Trump hian US-a TikTok khapna chu a leitu tur zawnna atan tiin vawi thum hun a pek belh tawh a, a hnuhnung berah hian September 17 thleng hun a pe leh a ni. Lei chhawn a nih hma hian a neitu company ByteDance hian an enkawl chhunzawm rih ang.

US Congress chuan US-a TikToK hmangtute data khawih chingpen leh, China sorkar hnenah app leh a parent company hian a hriattir ṭhin nia sawiin nikum April thla khan US-a khap turin an pawm a ni. Kumin January 19 aṭang khan he khapna hi hman ṭan tura tih ni mah se, President Trump hian a la ti khawtlai zel rih a ni.