Lady Gaga-in Chromatica album track list tlangzarh BLACKPINK hming a ri ring

Lady Gaga chuan a album thar tur 'Chromatica' track list a tlangzarh a, a fan-te an phur nghal hle.

'Chromatica' album-ah hian hla 16 a awm a, track list-a tihchhuah rual hian fan-te phurna tizual turin artist lar tak tak pathum a thawhpui tih a lang nghal a, hei hian sawi zui a hlawh zual. Ariana Grande leh Sir Elton John-te hming lang ringawt pawh hian fan-te phurna a tihzual tawh dawn tehreng nen K-Pop fan lawmna belchhah turin BLACKPINK hming hmuh tur a awm bawk a, hei hian K-Pop fan-te a tiphur zual ngei ang.

Lady Gaga chuan Insta­gram-ah track list hi a tarlang a, Ariana Grande hian 'Rain on Me'-ah a zaipui a, BLACKPINK hian 'Sour Candy'-ah pui bawkin Elton John chuan 'Sine from Above'-ah a pui thung.

'Chromatica' hi a tirah chuan tun thlaa tlangzarh hi a tum a, mahse hripui leng vangin tiam chin awm loin tlangzarh hun a tikhawtlai a ni.

Gaga hian 'Chroma­tica' album-a a hla dah tur chung­changte hi a hmain a lo sawifiah tawh a, a music tharah chuan 'damna' leh 'huaisenna' lam a inzep nasa dawn tih a sawi.

"Ka thil zirchhuak tak nia ka hriat chu, khawvel hi ka duh­thlanna angin ka hmu thei a ni. Thil ṭha lo zawng zawng ka paih bo tihna a ni lo a, ka nuna thil thlengte kha kawng dangin ka thlir tawh zawk a, chu chu Chromatica chu a ni. Chromatica-ah ka cheng a, Khawvel ka paih bo a, Chromatica-ah ka cheng a ni," tiin a album thar tur chungchang hi a lo sawi tawh a ni.

Kum 34 lai ni ve tawh Lady Gaga hi a hming tak chu Stefani Joanne Ange­lina Germanotta a ni a, 'Chromatica' hi a studio album parukna tur a ni a, February khan a album thar tura a single hmasa ber 'Stupid Love' chu a lo tichhuak tawh bawk.

Kum 2016-a 'Joanne' album a tihchhuah hnua a album tihchhuah leh hmasa ber tur a ni a, tunthla chhung hian kan ngaithla hman tura a lan laiin hripui leng vangin kan la ngaithla thei rih ta lo a, mahse a track list-te a tihchhuah takah chuan a tlangzarh thuai a rinawm.

 1.'Chromatica I'

 2.'Alice'

 3.'Stupid Love'

 4.'Rain On Me'

(featuring Ariana Grande)

 5.'Free Woman'

 6.'Fun Tonight'

 7.'Chromatica II'

 8.'911'

 9.'Plastic Doll'

10.'Sour Candy' 

(featuring Blackpink)

11.'Enigma'

12.'Replay'

13.'Chromatica III'

14.'Sine From Above'

(featuring Elton John)

15.'1000 Doves'

16.'Babylon'