Christian rocker 'Third Day' in 30th Anniversary tour nei dawn

Christian Rock band lar, Grammy award pawh vawi li ngawt lo dawng tawh Third Day chuan an band-in kum 30 an tlinna pualin nakkum 2026 hian tour an neih tur thu an puang. Tour hi ni 30 chhung awh tura tih niin kum 11 hnua band original member pali ten an play ho lehna hmasa ber tur a ni bawk.

Band original member hi Mac Powell(lead singer/guitarist), Mark Lee (guitarist), Tai Anderson (bassist) leh David Carr (Drummer) te niin kum 1991 khan Marietta, Georgia-ah an rawn in din chhuak a ni.

Tour-ah hian kum 1996-a an album tih chhuah, Billboard Christian Albums chart-a No.11 an lo hauh pui tawh bakah an hla hit 'Forever', Blackbird', leh 'Nothing at All' te an perform pui leh thei dawn a ni. Tour hi March 19-ah Jacksonville, Florida-a Vystar Veterans Memorial Arena-ah show ṭan a ni ang a, band awmna khua Atlanta-a Gas South Arena-ah May 10 khian tour kharna neih a ni ang.