World Para Athletics Championships brand ambassador atan Kangana Ranaut

Indian actor leh politician, Kangana Ranaut chu Nilaini khan World Para Athletics Championships, kumin September-October a neih tura brand ambassador atan ruat a ni. Kum 39 mi Ranaut hi film hrang hrangah a in lan tawh bakah, Himachal Pradesh-a Mandi constituency aiawhin Lok Sabha member a ni mek bawk.

Ranaut chuan," India para athlete-te thlawp thei tura hetiang dinhmun ka luah thei hi ka lawm hle a, para sport hi intihsiakna mai ni loin huaisenna lantirna a ni. Hei vang hian kan champion-te zinga ka tel hi ka lawm hle a ni" tiin a sawi.

PCI president leh Paralympic gold medal vawi hnih lo dawng tawh, Devendra Jhajharia chuan India athlete-te tana Ranaut inpekna leh a phurpuinate sawiin, New Delhi 2025 World Para Athletics Championships atana ambassador tur tak a nih thu a sawi. September 26 - October 5 chhunga neih tur Championships-ah ram 100 aiawhte an inel dawn a ni.