68th Grammy Awards-ah category leh dan thar hmang dawn

Recording Academy of United State in kumtina award a pek ṭhin, Grammy Awards-ah category thar leh dan thar eng emaw zat siam rem a nih thu an puang. Hemi rual hian nakkum 2026-a award sem hun tur February 1, Pathianni leh nomination puan hun atan November 7, 2025 chu tih chian a nih thu pawh an puang nghal bawk. Awards ceremony hi Los Angeles-a Crypto.com Arena-ah neih a ni ang.

Grammy Awards sem leh turah hian 'Best traditional country album' category siam belh a ni a, category awmsa ' best country album' chu 'Best contemporary country album' tihin a hming an thlak dawn bawk.

Category telh tawh loh 'Best Album Cover' chu dah thar lehin, category pahnih 'best recording package' leh 'best boxed or special limited edition package' chu hmun khatah 'Best Recording Package' tihin an thlak bawk. Siam danglam hnuah category 95 a awm thei dawn a, hei hi kum 2010-a category 109 a awm hnu a category a tam ber ṭum a ni dawn a ni.

Kum 2024 khan Disney Entertainment co-chairman Dana Walden leh Recording Academy CEO Harvey Mason jr-te chuan Grammys sem lai hmun hrang hranga pechhuak turin ABC, Hulu leh Disney+ te chuan kum 2027 aṭangin kum 10 chhung inremna neih a nih thu an puang. Kum 2027 aṭang chuan heng streaming platform te hian Grammys sem lai hi an ti chhuak tawh ang. Nakkum bikah chuan CBS in a pe chhuak ang.