38th Kids' Choice Awards June 21-ah nei dawn

Kum tina neih ṭhin Nickelodeon Kids' Choice Awards chu kumin June 21 hian a vawi 38-na turin California-a Barker Hangar, Santa Monica-ah neih a ni leh dawn. Kumin award sem hi 'Queen of Popiano', African singer leh songwriter ni bawk Tyla host-na hnuaiah neih a ni ang. Tyla hi South African zingah he show host thei hmasa ber tur a ni. Kuminah pawh Kids' Choice Awards hriat hlawhna pakhat 'slime hring' in a hmuna kalte chu an berh leh leiluai ngei dawn tih pawh a chiang.

Kids' Choice Awards, KCA tih bawk hi kum 1988 aṭanga neih niin TV a show hrang hrang bakah, movie, drama, leh rimawi hrang hranga naupang lawm zawng thlan chhuahna a ni. Show hi Nickelodeon bul tuma neih ṭhin niin Award ngaihhlut hlawh tak a ni.

Kumin award nominee te hi May 15 aṭang khan vote ṭan theih tawh niin, category hrang hrang aṭang hian Ariana Grande, Lady Gaga, Kendrick Lamar, leh Selena Gomez-te chu nomination hmu hnem zualte niin pali ṭheuh an hmu. Anni bakah Jack Black, Dwayne Johnson, leh Jelly Roll te chuan pathum ṭheuh an hmu bawk.

Jack Black chu film, television, music leh thil dang hrang hrangah a thawh hlawk avangin chawimawina, 'King of Comedy Award' hlan a ni dawn. Black hi he award dawng thei pahnihna tur a ni a, Adam Sandler hnenah kum 2023 khan hlan a ni. Black hian kum 2006, 2008 leh 2011 khan Kid's Choice Awards hi a lo host tawh bawk a ni.

Kids' Choice Awards-ah hian category a chikim hle a; music, movie, sport, leh video games khel ṭhinte thlengin award dawn theihna chance a awm a ni. Awards show hian mit a ti tlai leh dawn hle a, musical performance pui tak tak bakah skateboarding display leh dance act te thlir tur a awm dawn.

Animated series SpongeBob SquarePants chu KCA awards dawng hnem ber niin a series pumpui hian award 21 a dawng a ni. Mi malah Selana Gomez leh Adam Sandler te chu dawng hnem ber niin 12 ve ve an dawng tawh bawk.