Tha Carter VI album nen Lil Wayne a rawn kir

American rapper, hun rei tak chhung rimawi huanga thawm reh tawh Dwayne Michael Carter Jr. aka Lil Wayne chu a album thar, 'Tha Carter VI' nen rimawi khawvelah a rawn kir. Lil Wayne hian a album thar hi nimin Zirtawpni khan a ti chhuak a, kum sarih zet a chawlh hnuah rimawi khawvelah a rawn kir leh ta.

Album tharah hian mi lar ṭha tak tak BigXthaPlug, Big Sean, Bono, MGK, Kodak Black, Jelly Roll leh 2 Chainz-te a rawn thawh pui a. Anni bakah hian production lamah Kanye West chu board zingah a ruat tel bawk.

Wayne album chhuak tawh pathumte khan chart-ah pakhatna an hauh vek thei a ni. Tha Carter VI album tih chhuah hma hian Wayne chuan album thara Bono nen an thawh dunna "The Days" tih hla ti chhuak tawh bawkin, he hla hi ESPN chuan Indiana Pacers leh Oklahoma City Thunder NBA Final promo atan Ningani khan an hmang nghal a ni.