KISS biopic-ah Nick Jonas-a'n Paul Stanley lem chang dawn

American rock band, kum 1973-a New York khawpuia din, KISS chanchin film-a siam turah Jonas Brothers zinga mi leh India makpa ni bawk, Nick Jonas chuan KISS band rythm guitarist leh frontman, Paul Stanley lem a chang dawn. Nick hi film hrang hrang Goat, Midway, leh Jumaji-ah te hlawhtling takin a lo in lan tawh a ni.

KISS band biopic siam tur hi kum 2021 aṭanga buaipui ṭan tawh niin, 2023 khan buaipui a nih thu hi manager Doc McGhee chuan a puangzar chauh thung. McGhee sawi danin biopic-ah hian KISS band din tirh kum li chhunga mi chauh kha tih lan tum a ni. Biopic hi McG in a direct nghal anga, screenplay erawh Darren Lemke in a ziak thung.

Biopic siam turah hian chang tur la thlan kim loh niin, band member zingah mi tam zawk lawm hlawh leh ngaihven em em, bassist Gene Simmons lem chang tur pawh tihfel a la ni lo . KISS hian kum 2027-ah 'digital avatar show' chu Las Vegas-ah an ti chhuak dawn bawk.