Vogue Beauty & Wellness Awards-a sawm bik zingah Lawm from the Hills

Mizo skincare brand, Lawm from the hills chu Mumbai-a Vogue Beauty & Wellness Awards neih zawh takah sawm bik zingah telin brand neitu, Puipuii Hmar a tel.

Vogue India leh Tira Beauty (Reliance hnuai) sponsor-in May 26, 2025 khan India rama Beauty leh Wellness lama sawm bikte tana buatsaih, Vogue Beauty & Wellness Awards hi neih a ni. He hunah hian Bollywood mi lar Shilpa Shettt, Aditi Rao Hyderi, Jackie Shroff, Samantha Ruth Prabhu, Bhumi Pednekar te pawh an tel a ni.

Lawm from the hills neitu, Puipuii Hmar hi Tira Beauty CEO nen pawh inhmu in, Tira Beauty-ah an brand an dah thei nghal dawn bawk.

Lawm from the hills hian a tum ber chu mi nawlpuiin skincare kan hman hnem ber leh ni tin vun mamawh product te man man zawk, quality ṭha si a chhawpchhuah a ni. Mizoram hmun hrang hrang aṭanga thar chhuah walnut (Khawkherh) oil, perilla (Chhawhchhi) oil, sacha inchi oil bakah mau aṭanga tui (Bamboo Hydrosol) hmangin an product te hi siam an ni. An brand launch hi online veka tiin, Instagram leh Whatsapp hi an hmang tangkai hle.

Tunah hian product pariat - facewash, sunscreen, face oil (Walnut oil), body oil ( Glow Drops) leh lip gloss te an nei a, Rs 350 aṭanga Rs.800 in karte an ni hlawm. Hengte hi wholesale-a an pek chhuah bakah, direct-in Instagram, an website leh Myntra ah te an hralh chhuak bawk a ni. Zepto(Quick commerce), Tira Beauty leh Nykaa Online Beauty Store ah te zawrh chhuah tura hmalak mek a ni bawk.