Lehkhabu bawm: 'Seven Golden Articles' Vol-II tlangzarh

Ruata Chawnghlut lehkhabu, 'Seven Golden Articles' Volume-II chu nimin khan I & PR Auditorium, Treasury Square-ah education minister Dr. Vanlalthlana'n a tlangzarh.

Tlangzarh inkhawm hi C. Laizawna'n a kaihruai a, Rev. KC. Vanlalduha'n hunserh a hmang. Lehkhabu thlirna hun hi Lalrammawia Ngente in neiin, 2024 Praise on-a pakhatna Lalthlanawma a zai bawk.

'Seven Golden Articles' Volume-II hi mi hrang hrang article ziah thlankhawm niin, kum 1992 khan Volume-I tih chhuah a ni a, a inkarah kum 33 a tla a ni. Ruata Chawnghlut lehkhabu pathumna niin, kum 2015 khan 'Ka khualzinna Ram' tih chu a lo ti chhuak tawh bawk. He lehkhabua article pasarih thlankhawm zingah hian Prof. Darchhawna ziah 'Mizoram hi kan ram a ni', Biakthansanga Khiangte ziah 'Khawvel chhanhim rawh', LB Tluanga ziah 'Bye bye School run nuam', Thatsavunga ziah 'Ram leh hnam humhalh dan tur chu', Lalremliana Pachuau ziah 'Kan ram dinhmun diktak avangin ka mangang', KC. Lalmalsawmzaua ziah 'Easternization' tih te leh zirbing rualin an ziah 'Ram leilung fa' part-I leh II te an tel.