DR Congo-a tuilianah mi 100 chuang thi

Democratic Republic of Congo (DR Congo) khawchhak lam, Sud Kivu province-a Kasaba khuaah tuilian vangin mi 100 chuang an thi.

Ruah sur nasa avangin Kasaba lui nasa takin a lian a, tuilian hian Kasaba khua kar liam ta kartawp lam khan a chim a ni. Tuilian vanga thi zinga a tam zawk hi naupang leh kum upa lam an ni a, hliam tuar 28 awmin, in 150 vel a len chhe bawk.

Kasaba khua hi Tanganyika dil chunga awm niin dil kaltlanga pawh theih chauh a ni. Internet service a awm lo a, harsatna tawkte chhawmdawl hna thawhna kawngah pawh harsatna an tawk niin an sawi.

South Kivu provicial health minister, Theophile Walulika Muzaliwa chuan tuilian tuarte chhanchhuah leh chhawmdawl hna hi thawh mek a ni tih a sawi a, hetih lai hian he bialah hian Red Cross chauh chu humanitarian organisation awm an nih thu a sawi.

DRC-ah hian khuarel chhiatna a thleng fo a, a bikin khawchhak lam biala khuate hi lui kama awm a nih avangin an tuar ngun zual a ni. Kum 2023 khan tuilian vangin South Kivu province-a Lake Kivu kama cheng mi 400 an lo thi tawh bawk.