Kate Middleton hming chawiin rose thar hming phuah

Royal Horticultural Society chuan Princess of Wales, Kate Middleton hming chawiin rose chi thar pakhat chu 'Catherine's Rose' tiin an vuah.

Princess of Wales hian pawn lama hun hman a pawimawhzia leh thilsiamten tih dam theihna an neih thu a sawi fo ṭhin a, chumi lawmna atan he rose chi thar hi Catherine’s Rose tiin an phuah tih RHS chuan a sawi. Harness Rose aṭanga siam chhuah, Catherine's Rose rawng hi coral pink niin, par khatah hian a mal 15 vel a awm a, a par hlai zawng hi 8-12 cm te an ni. A rim hi Turkish delight leh theihai rim lam hawi a ni. Rose hi lei theiha chhawp chhuah a ni tawh a, kung khat hralh chhuah a nih apiangin £5 (USD 6.65) chu Royal Marsden Cancer Charity hnenah pek a ni dawn a, cancer veite tana specialist rehabilitation program siamna turah a pui dawn a ni. King Charles chu RHS Patron niin, a hmain Queen Elizabeth chu kum 70 chhung zet, kum 2022-a a thih thlengin Patron a lo ni tawh bawk a ni.