Malaysia-ah Ben Hur an siam danglam

Ben-Hur film chu Malaysia-a chhuah turin an siam danglam hret a, Isua lanna lai an paih! Malaysia hi Muslim tamna ram a ni a, Isua lantir danah Muslim-te lung a awi loh an hlauh avangin an paih.

Malaysia-ah hian Muslim dan eng eng emaw hman tel a ni a, Ben-Hur hi khawthlang ram lamah sum a hmuh tlem avangin ram dang aṭanga sum tam tak a lakluh loh chuan an dinhmun a chhe hle dawn. Hei vang hian Malaysia rama chhuah tur hian Isua lanna lai eng emaw zat paih a ni a, a film pawh minute 11 ngawtin a tawi phah dawn a ni.

Mi ṭhenkhat chuan Isua lanna lai an paih hi an duh lo hle a, he film thawnthua a pawimawh lai tak a ni an ti a, sawisel pawh an sawisel viau. An paih lai tak hi Isua an khenbeh lai kha a ni. Muslim-te ngaihdanah chuan Isua kha an thi lo a, an khengbet lo a, vanah a lawn a ni an ti.