Kum 8 hnuah Bob Dylan a lo kir 'Murder Most Foul'
Music legend Bob Dylan chuan kum riat lai hla thar a tihchhuah tawh loh hnuah Zirtawpni liam ta khan hla thar 'Murder Most Foul' a tichhuak.
Bob Dylan hla tharah hian United States president hlui John F Kennedy kum 1963-a thah a nih dan chungchang tarlan a ni a; The Beatles, The Who, Nat King Cole leh festival lar tak Woodstock festival-te pawh a sawi lang a, thil dang tam tak a inzep bawk.
Dylan hian Twitter-ah a hla tihchhuah thar chungchang hi sawi langin, a fan-te hnenah kum tam tak chhung an thlawp tawh avangin lawmthu a sawi a, a hla tihchhuah chu hun eng emaw chen liam tawha a record, a la tlangzarh loh a nih thu a sawi lang bawk.
Kum 78 mi Dylan hian kum 2012-a 'Tempest' a tihchhuah hnuah khan hla thar a la tichhuak leh lo a, 'Murder Most Foul' hi a hla tihchhuah leh hmasak ber a ni.
Hla dangdai 'Murder Most Foul'
'Murder Most Foul' hi a dangdai hle a, zai leh thawnthu sawi inkar velah a dah thei ang. Thawnthu thluk neiin a sawi a ni ber.
Dylan hian mi bik a nihna a lantir leh a, kum upa tak ni tawh mah se a hla tihchhuah thar hi a danglam hle a, minute 17 laia thui a ni.
YouTube-ah pawh Twitter-a a sawi ang tho hi pin post-in comment-naah a dah a, comment-tu lam pawhin an fak lehpek hle a, hla lungchhiat thlak tak niin mi ṭhenkhat chuan an ngai bawk.
John F Kennedy thah a nih lai vel, kum 1960 chhoa thil lar hrang hrang a hlaah hian a telh nasa a, hei hian America mi, a bikin kum upa lam lunglenna a kaitho ngei ang.
- 'Murder Most Foul' hi Dylan-a discography-a track sei ber a ni.
- A hla thui zawng hi minute 17 a tling hial!
-A lyrics hi verse bakah part hrang hranga ṭhen darh tham a ni.
- John F Kennedy thah a nih chungchang tarlanna hla a ni a, khatih hunlaia thil lar tak tak kha hla thuah hian a tel hnem hle.
Mi ropui Bob Dylan
A hming tak chu Robert Allen Zimmerman a ni a, kum 78 a ni tawh.
Kum 1961 vel aṭang khan khawvel hriatah a lar ṭan a, vawiin thlengin mi ngaihsan rawn, rimawi huangah phei chuan ani aia 'legend' tia sawi tur leh chuang tur hi an tam lo hle ang.
Kum 2016 khan Nobel Prize in Literature a dawng hial. Hla ṭha tak tak, 'ril' tak tak a phuah nasa a, a hla tam tak hi tunlai zaithiamte pawhin an cover nasa hle.
A hla hit, Knockin' on Heaven's Door, Blowin' in the Wind leh The Times they are Changing-te leh a hla dang tam takte chu vawiin thlenga khawvel zaithiam larte'n an cover nasat ber pawl an la ni reng.