Ṭhazual Lengzemah Lalsangliana (Taitea) che ṭha chhunzawm

GIG Ṭhazual Lengzem chart tharah chart hmasa lama pakhatna hauhtu, Zoram rimawi khawvela thawm nei lian, Youth Icon 2024 Lalsangliana (Taitea) chuan a hla phuah "Hmangaihna Runthlak" chu pakhatna a nihpui chhunzawm.

Youth Icon a nih hnua Taitea music video hmasa ber hi Dr. Reuben Lalmalsawma, Zothlir production kutchhuak a ni a, music leh recording hi EME records-ah a tih a ni. March 29, 2025-a tih chhuah kha niin thla khat chuang hretah view hi 1.8 million a tling tawh. Taitea zaithiam zia sawi nawn a ngai lo a, "Hmangaihna Runthlak" hi ngaithlatu an la pun chhoh leh zel a rinawm.

Chart hmasa lama pathumna, SaiWanah ft. Fakriel 'Mualkil Fanu' chu pahnihnaah rawn langin, he hla hi SaiWanah phuah a ni a, Music leh recording hi Vulmawi Studio-ah tih niin, mixing leh mastering hi Randy Zaitea kutchhuak a ni a, music video hi Ps Production siam a ni. Pathumnaah Lil Kiki 'Ka nula ngei i ni' rawn langin, No.4-ah hian Samson Vanchhawng 'Ka rawn hruai ang che' a lang bawk a, SaiWanah 'Lei Vanram' chuTop 5-ah a lang bawk.

Ṭhazual Lengzem Top 10-ah hian Mendal ft. Rachel, Young fella x Henz x Smiley, Zothankima, Bka Hnamte leh Mawimawia ft Lesky Hype te an lang bawk a ni.