Lady Gaga free concert chhimtu mtd 2 an tling

American singer, songwriter leh actress ni bawk Lady Gaga chuan Inrinni liamta khan a album thar ber leh studio album pariatna ni bawk, 'Mayhem' promote-na concert ni pah fawmin Rio de Janeiro, Brazil-a Copacabana tuipui kamah free concert a nei a, mi maktaduai hnih chuangin concert hi an chhim niin official ten an tarlang.

Concert-ah hian Brazil themed costume hmangin a rawn inlan a, a hla hit hrang hrang Abracadabra, Die With a Smile, Alejandro, leh Poker Face-te pawh a perform bawk. A perform hma hian Gaga fans, "Little Monsters" te hmaah chuan Brazil flag kengin lungchhe takin, "Hun rei tak chhung min lo nghak a, ka theihna zawng zawng in tan ka chhuah ang" a ti.

Fans lam hi concert-ah hmun ṭha chan loh hlauin zing hma tak aṭangin an pungkhawm tawh a ni.

Gaga concert hi khawpui economy tih hmasawn a nih theihna turin Rio khawpuiin a senso zawng zawng a tum a ni. Official lam tarlan he concert hmang hian an khawpui hian USD mtd 100 a lak luh phak an beisei.

Gaga hi Rio-a free concert nei hmasa ber a ni lo a, kum 2024 khan Madonna chuan Copacabana-ah tho hian khawpui thuneitute senso tumin free concert a nei ve tawh bawk.

Inrinni zana Lady Gaga concert-ah hian venhimna lam pawh ṭha taka kalpui niin, police 5,000 duty-in concert chhimtu zawng zawng te metal detector hmanga an check vek bakah hmel hrehrang thei camera leh drone te hmangin mipui pungkhawmte hi an vil reng a ni.