Mizo Idol star Alex a her liam ta

Mizo Idol season hmasa ber, kum 2007-a neih aṭanga Mizoram dung leh vanga kan hriat lar, Alex Lalchhuankima(37) chu nimin Thawhlehni zing dar 3:17 khan hun rei tak chhung a lo tawrh tawh pile cancer natna vangin kan chan ta. Alex-a hian a nupui Gracy VL Pachuau leh an fanu a kalsan. Tanhril-a khawsa niin nimin chawhnu dar 1 khan Tanhril Community Hall-ah an vui a ni.

Alex-a hi Mizo Idol season hmasa berah hian parukna niin, Music Domain Mizoram (MDM) dintute zingah pawh a tel a ni.

All India Radio-ah 'B' grade artist a ni pha bawk. Zai bakah lemchan lamah pawh a tui a, sulhnu ṭha tak a nei bawk. Film hlawhtling tak takah changin, heng zingah hian Zawlpala Thlan tlang, Khawnglung Run, Lungdumtu, Zeuh Keuh leh Dakpu te pawh a tel. Kum 2021 khan State Level Drama Competition-ah Best Actor ah thlan a ni. Directorate of Film Festivals, Ministry of Information & Broadcasting chuan Fragnances from the North East an hlan tawh bawk.

A natna avangin Alex-a hi hun eng emaw chen Kolkatta-ah enkawl a nih hnuin Mizoramah rawn hawin enkawl chhunzawm ni. An rawn haw hnuah thla khat dawn enkawl ni lehin nimin zing khan chatuan ram a pan ta a ni

Mizo mipa zaithiam kan neih ṭhat zinga mi, Alex-a hian uitu leh suntu a ngah a, nimina a vuinaah pawh thlah liamtu an ṭhahnem hle. Rimawi hmanga mipuite min awitu, aw pa leh mawi tak mai nei, Alex-a hi Zoram chuan a sun tak zet a ni.