Addison Rae debut album chhuah hun tur puang

American social media personality, singer leh actress ni bawk Addison Rae chuan a album hmasa ber tur "Addison" tih chu Columbia Records hnuaiah kumin June 6 hian a tih chhuah tur thu a puang. Artist hian nikum aṭang tawh khan a album hlawhtlin theihna tur hian hma a lo la tawh a ni.

Addison hi kum 2019 khan TikTok aṭanga rawn lar chhuakin, mipui ngainat a hlawh chho chak hle bawk. Album a tih chhuah hma hian a single “Diet Pepsi,” “Aquamarine” leh “High Fashion” ti chhuak tawhin, kar hmasa khan "Headphones On" tih Luka Kloser leh Alvira Anderfjärd te produce leh co-write a ti chhuak bawk. Kumin kum tir lama Rolling Stone-in an kawmnaah album thar tura hlate hi Luka Kloser leh Alvira Anderfjärd te nen an siam ho vek thu a lo sawi tawh a ni. Rae hian kum 2021 khan a single hmasa ber “Obsessed” a lo ti chhuak tawh a, August 2023 khan a EP hmasa ber “AR” tichhuak lehin, Charli xcx leh Alexander 23 te nen track paliah an thawkho bawk a ni.