Lehkhabu bawm: 'Thlado' tlangzarh a ni

Gabriel Lalmuankima lehkhabu ziah 'Thlado' chu Pachhunga University College, Mizo Department Room-ah nimin khan Department of Mizo HOD Dr H. Laldinmawia'n a tlangzarh.

Mi thiam tam takin Mizo history, culture leh heritage chungchang an lo ziak tawh ṭhin a, hriat dan inang lo leh lehkhabu mala a awm kim ṭhin loh avangin, Thlado lehkhabu hi hetiang lam ziahna lehkhabu 62 hmanga khawr pum a ni. Mizo ṭawng chungchang, Mizote thlang tlak dan, Mizote nunphung chi hrang hrang, serh leh sang, sakhaw biak dan, puithuna thil chi hrang hrang ziah a ni. Mizote lal rorel dan leh an pawimawhna, khawtlang inawp dan, Zawlbuk pawimawhna leh a tawp dan, Zawlbuk tihtawp a nih loh nana hma an lak dan te ziah a ni. Mizote thuam leh an hmanraw chi hrang hrang chipchiar taka dah khawm a ni. Mizote’n indona chi hrang hrang an hmachhawn te, British-in Mizote awp tuma an beih dan te, Mizote an awp tak hnua Mizorama lalte rorel dan leh an thuneihna an chhuh dan te leh Mizorama political party lo indin chhoh dan chungchang tarlan a ni bawk.

Mini Edition Rs 300 man leh PYQ Edition Rs 500 manin siam a ni. LEHKHABUK (Online Booke Store), MS Academy (Coaching Centre) leh Rahbi (Coaching Centre)-ah te lei theihin a awm.