Box Office: Minecraft movie nek chhuaktu 'Sinners'

North America Box Office-ah director Ryan Coogler leh Michael B. Jordan te original, R-rated vampire thriller “Sinners” chuan thawm nei ring tak, “A Minecraft Movie” nek chhuakin box office-ah hma a rawn hruai. “Sinners” hian tlangzarh karah North American theatre 3,308 aṭangin USD mtd 48 zet a la lut a, Jordan Peele “Us” in kum 2019-a USD mtd 71 a lak luh hnua original film debut lian ber niin, Warner Bros. chuan “Sinners” siam nan hian USD mts 90 an hmang a ni.

International box office-ah “Sinners” hian USD mtd 15.4 a la lut bawk a, a kar khatnaah khawvel puma a sum hmuh chhuah hi USD mtd 63.5 a tling.

Warner Bros. “A Minecraft Movie” chu a zawna a kar thumna atan No 1 a nih leh beisei a nih laiin, 'Sinners' a rawn lang a, pahnihnaah tla thlain, USD mtd 41.3 a la lut. Jack Black leh Jason Momoa te channa PG video game adaptation hi a hlawhtling hle a, ram chhungah USD mtd 344 leh khawvel pumah USD mtd 720.8 a la lut tawh a ni. Pathumnaah hian “The King of Kings” chuan cinema 3,535 aṭangin USD mtd 17 a la lut a, a debut aṭangin 10% in a tlahniam thung.

Disney vigilante spy film “The Amateur” chu No. 4-ah a tla thla a, venue 3,400 aṭangin USD mtd 6.8 a la lut. Ram chhungah a sum lak luh tawh hi USD mtd 27 niin khawvel pumah USD mtd 64 a la lut tawh bawk. "Warfare" USD mtd 20 senga siam chuan USD mtd 4.9 lalutin Top 5-ah a lang ve bawk.

Box office Top 10-ah hian "Drop", "Colorful Stage! The Movie: A Miku Who Can't Sing", "Pride & Prejudice", "The Chosen", leh "Snow White" te an lang bawk a ni.