Billboard 200: No.1 ah Playboi Carti 'MUSIC'

Billboard 200 album chart tharah American rapper, Playboi Carti chuan a studio album 'MUSIC' chu No. 1 a rawn nih pui a, No 1 ni thei album pahnih a neihna a ni.

March 20 kar tawpah 'MUSIC' hian US-ah equivalent album unit 298,000 a nei a, album sale hi 14,500 niin kumina kar khat chhunga rap album hralhchhuah hnem ber a ni. Carti hian 'MUSIC' hi September 12, 2024 khan tih chhuah a nih tur thu a lo puang tawh a, hemi ni vek hian pre-order theih nghal a ni. Digital download chauha lei theih a ni a, karleh lamah CD-a tih chhuah a ni ang. He album-a hla 30-te chuan on-demand official stream mtd 384 an nei a, kumina album chhuak zingah stream ngah ber a ni bawk a ni.

Playboi Carti hian Billboard 200 Top 10-a lang thei album pathum a nei thei ta a ni. 'MUSIC' ah hian Kendrick Lamar, Travis Scott, Future, Lil Uzi Vert, The Weeknd leh artist dang a thawhpuina pawh a tel. A tih chhuah hma hian Ye pawh a lang ve dawn tiin lo sawi tawh mah se, a final-ah erawh a tel ve ta lo.

Chart hmasa lama pakhatna dinhmun hauhtu, Lady Gaga 'MAYHEM' chu No.2 ah tla thlain, equivalent album unit 74,000 a nei a, a kar hmasa lam aiin 66% in a tlahniam a ni. Pakhatna lo ni tawh, Kendrick Lamar 'GNX' chuan equivalent album unit 71,000 neiin No.3-ah a awm a, PARTYNEXTDOOR leh Drake thawhdunna, '$ome $exy $ongs 4 U' chuan equivalent album unit 66,000 neiin palina an ni. SZA album 'SOS' chuan equivalent unit 62,000 neiin panganaah a lang bawk.