Project Chawlhna Krista ti chhuak dawn

Zaithiam leh zaipawl hrang hrangin zaithiam leh hla phuah thiam, Chris MS Dawngkima hla an sak dahkhawmna music video 'Project Chawlhna Krista’ tih chu peihfel a ni dawn ta. Episode hnih a ṭhen niin, Episode-1 hi April thla chawhnu lamah tihchhuah a ni ang.

Project Chawlhna Krista-ah hian Chris-a hla hlui 12 bakah a hla thar 10 dah niin, video hi M-Space kutchhuak a ni a, audio post production hi EFX Audio kutchhuak a ni. Live shooting neihnaah Active Sound ten recording tiin, Brigter Co.-in stage set up an buaipui ve thung.

Project Chawlhna Krista ah hian organising committee din niin, Chairman David Zodintluanga leh Secretary VL Thuneia te kaihruainain 2024 kum tawp khan hmalak ṭan a ni. March 14 khan Convention Centre, YRC-ah Programme Coordinator Lalnunmawia kaihhruaiin live shooting an nei a, PC Zonuntluangi'n a host a ni. Chris-a hla 22 chu music video chu tih chhuah turin an puitlin ta a ni.

'Project Chawlhna Krista'-ah hian gospel singer hriathlawh tak tak Zoramchhani, Cindy Lalthanpuii, Stacy VL Muanpuii, R. Lalrinmawii, Melody Lalzirliani, Steward Lalrochama, Is-a Pachuau, Isaac Hnamte, Zorinsanga Sailo leh Samuel Lalmuanchhana te bakah Ramhlun North Pastor Bial Zaipawl, The Leprosy Mission Choir, Peace Choir leh JB acappella ten Chris-a hlate hi an sa a ni. Backing vocals lamah hriat hlawh Rita Renthlei te unau-in an pui a, H. Laltanpuia , Hmangaihkima, Lalchhanhima Khiangte, K. Lalremsanga, Vanlalhriatrenga, Lalengmawia leh Esther L. Khiangte te chu musician te an ni.