Eminem hnuaia hnathawk ṭhin thubuai siamsak

Kumin kum tir lama Eminem music la release lohte rukbo leh hralh kaihhnawihah, a hnuaia hnathawk ṭhin Joseph Strange chu thubuai siamsak a ni. Strange-a hi kum 2007 aṭanga 2021 thleng khan Grammy pawh lo dawng tawh rapper tan hian a thawk ṭhin a ni.

Strange-a chu Eminem music hralh ruksak kaihhnawihah copyright bawhchhiatna leh interstate-a thil ruk thawn chhuah thubuai siamsak a ni tih US attorney Julie Beck chuan a sawi. January thla khan track-te chu web-a tihchhuah a nih hnuah, studio-a thawktu engemaw zatin music la tih chhuah lohte chu online-a hmuh theih a nih thu FBI te hriattirin, FBI-te chuan Eminem music tihchhuah loh lei tute chu an zawnna lamah, Strange chu a hralhtu a ni tih an hre chhuak ta a ni.

Copyright bawhchhiatna thubuaiah thiam loh chantir a nih chuan, Strange hi kum nga chhung lung ina tantir theih niin, USD 250,000 thleng chawitir theih a ni bawk. Bungraw ruk state danga thawn chhuah thubuaiah hian, a tam berah kum 10 chhung lung in tantir theih a ni bawk.