TXT Yeonjun-a'n naupangte ṭanpuina pe

TOMORROW X TOGETHER member, Yeonjun chuan naupang harsa zawk, ei leh in tur nei ṭha lote ṭanpuina turin USD 37,000 a pe.

Good Neighbors chuan nimin khan Yeonjun-a'n an ram chhung naupang harsa zawkte puala ei tur pek ṭhin puihna tura sum ṭhahnem tak a thawh thu hi a puang. A sum thawh avang hian Yeonjun hi The Neighbors Club-ah a tel phah bawk a, hei hi kum khat chhunga ṭanpuina sum USD 7,500 pe tling leh, midangte chhawmdawlna lam tha thawhtute an sawina a ni. Yeojun chuan, "Chhungkaw pakhata member pathumin zanriah aṭanga ramen bawm khat a inṭawm thu ka chhiar hnuah ṭanpuina pek duhna rilru hi ka pu a ni. Ka thil pek tam tham lo tak hian a mamawhtu naupangte hnen a thlen a, hriselna ṭha tak pawh an neih theih phah ka beisei," a ti.