Micromax-in octa core phone a tichhuak

Man tlawm si, a spec ropui leh turu tak mai tihchhuah lamah Micromax hi khawvelin a hmelhriat mek. Hugh Jackman nena thawk dun Micromax chuan octa core processor hmang, Canvas Xpress 2 chu Rs. 5,999-in a tichhuak ṭan ta. He phone hi Flipkart-ah chauh zawrh chhuah a ni ang a, chu pawh flash sale-in a ni ang.

Hralh chhuah hma­sak ber tur hi August 4, chaw­hnu dar 2-ah a ni ang a, nimin aṭang khan a duhte tan chuan in-regis­ter theih a ni tawh a, flash sale chang duhte tan hian August 3 zanlai thleng a in-register theih ang.

Canvas Xpress 2 hmai hi inchi 5-a hlai a ni a, Corning Gorilla Blass 3 protestion nena tuamhim a ni. 1.4 GHz octa core a hman bakah hian a RAM hi 1GB a ni. Bilh sa a storage hi 8GB a ni a, 32GB a lian thleng memory card a hman theih. OS lamah chuan Android KitKat a hmang a, Lollipop-a upgrade theih a ni.

A hnung lam camera hi 13MP a ni a, OmniVision sensor leh dual LED flash nena cheibawl a ni. A hma lam camera hi 2MP a ni thung.