Pawnto hla leh Pipu zai music video tlangzarh

Octave Mizo choir leh Mizoram Tourism Department te thawh dunna, 'Pawnto hla leh Pipu Zai' music video chu Inrinni, March 1, 2025 khan Hyve Aizawl City Hall-ah tourism minister Lalrinpuii'n a tlangzarh.

Pawnto hla leh Pipu Zai hi Lalsiamkima, Lecturer, Music, ATC arrange niin, a nihna dik tak bo si loa ṭhangthar te pawhin mawi an tih theih tur angin a rawn siam a, Octave Mizo Choir ten thiam takin an rawn sa a ni. Octave Mizo Choir hi January 1, 2023 a din niin, Pawnto hla leh Pipu Zai hi an music video pangana a ni. Recording hi Kings & Prophets leh Ace Studio-ah neih niin, an music video hi Mizo culture pholang thei, ṭhangtharte tana hmuhnawm tak ni tura siam a ni a, director hi Paia Pachuau niin videography hi BS Pictures & Crew te kutchhuak a ni bawk. Octave Choir music video thar Pawnto Hla leh Pipu Zai hi Octave Mizo Choir YouTube channel ah dah a ni bawk. Local channel Zonet leh LPS ah pawh en theih thuai tura beisei a ni.